Dje lexova një përrallë qesharake por mësimdhënëse. Gjegjësisht, në përrallë përmendet se gomari ishte lidhur për një peme, kështu që erdhi shejtani dhe e zgjidhi litarin. Gomari vajti tek ara e fqinjit dhe hëngër dhe shkatërroi gjithçka. Gruaja e fshatarit kur e vërejti çfarë ka bërë gomari me të mbjellat e tyre, mori pushkën e burrit të saj dhe e vrau gomarin. Pronari i gomarit e dëgjoi krismën, dhe i irrituar duke parë gjakun që derdhej vërdallë nga gomari i tij, mori pushkën dhe vrau gruan e fqinjit. Kur fqinji u kthye në shtëpi dhe e pa gruan e vdekur dhe gomarin e fqinjit, mori pushkën dhe e vrau atë. Më vonë shejtani u pyet: “Çfarë ke bërë?” Ai u përgjigj: “Asgjë, përveç se që e zgjidha gomarin”.
Njerëzit e arsyeshëm e dinë që gomarllëku nuk është i lidhur ekskluzivisht me krijesën katërkëmbëshe, por që kjo është cilësi e shumë njerëzve. Derisa “gomarët” e tillë janë të lidhur, bota është në qetësi. Megjithatë, atë çast kur ai zgjidhet apo i këputet litari, pasojnë shkatërrimi i të mbjellave, tokës dhe njerëzve. Dhe populli i cili i zgjidh ata “gomarë”, duke e ditur gomarllëkun e tyre, simbolizon shejtanin dhe për këtë do të jetë përgjegjës.
Krizat botërore për të cilat jemi dëshmitarë, nuk do të kishin përfshirjen e tillë armiqësore sikur “gomarët” të mbeteshin lidhur. Por, ne i kemi zgjidhur dhe tani ata shkatërrojnë gjithandej, bëjnë krime dhe ngatërresa në tokë, në veçanti udhëheqësit politik me cilësi gomari, por edhe mediet (gazetarët) dhe individët të cilët i shfrytëzojnë mediet, në veçanti rrjetet sociale, u ndihmojnë “gomarëve” të bëjnë dëm dhe krizë të madhe. Sepse, çfarë mund të prish një “gomar”, njëqind të mençur nuk e rregullojnë dot, e lëre më kur askush nuk ndërmerr asgjë.
Të tillë harrojnë se liria është përgjegjësi dhe jo lirim nga përgjegjësia. Njeriu është i lirë aq sa është i vetëdijshëm për përgjegjësitë, të drejtat dhe detyrat e tij. Prandaj ndalimi i zgjidhjes së “gomarëve” është krejtësisht e ndaluar, sikur edhe ndalesa ti furnizosh me armë të çmendurit. Dhe, nëse njerëzit duan ta ndalojnë krizën, atëherë së pari duhet t’i lidhin “gomarët” e tyre.
Burimi: Akos.ba
Përktheu: Lutfi Muaremi
lutfi muaremi 